Pinning Ceremony, idinaos dahil sa SHS

Nagbibigay ng ilang pahayag si Krizia Estrella, isa sa mga bagong babaeng estudyante ng Senior High School. (Kuha ni Joaquin M. Arriola)

Upang magsil­bing opisyal na paghirang ng ikalabing-isang baitang (Batch Q, 2018) bilang unang pangkat ng mga mag-aaral na sasabak sa Senior High School (SHS), idinaos ng Clar­et School Quezon City (CSQC) ang kauna-una­hang Pinning Ceremony ng paaralan noong Hulyo 29, 2016 sa Bulwagang awdyo-biswal.

Ito’y munting paraan upang maitatag na ang ti­tulo ng mga estudyanteng nakatapos na ng Junior High School, bilang pagtu­gon sa bagong kurikulum na itinakda ng Departamento ng Edukasyon – ang K-12 program.

Nagsimula ang daloy ng programa sa pambungad na pananalita ng punungguro ng Mataas na Paraa­lan ng CSQC na si G. Paolo Josef L. Blando, na nagbigay ng motibasyon at pagpuri sa kanyang mga minamahal na mag-aaral sa kanilang naka­mit na milyahe sa kanilang buhay bilang estudyante. Isinama rin niya na hindi roon nagtatapos ang pag-aaral, kundi dito nagsisimu­la ang panibagong yugto ng pagiging mas responsable at seryosong mag-aaral.

Matapos ang nasabing introduksyon, agaran nang dumako sa layun­in ng programa ang mga adminstrador at mag-aaral – ang isahang pagkabit ng Batch Q ng kanilang mga pin – kung saan ang mga bagong lipat na estudyante ay isa-isang dinikitan ng pin ng mga administrador at guro. Ilan sa mga nanguna sa paglalagay ng pin ng mga mag-aaral ay sina G. Bonifacio S. Suficiencia, G. Keith A. Nicodemus, at Gng. Laarni D. Buenaventura.

Matapos ang nasabing bahagi ng programa, pina­ngunahan naman ni G. Dwight Anthony Palma ng 11-SAH ang pagbigkas ng Claretian Oath, bilang isang paraan ng pagpangako ng katata­gan at katapatan sa mga re­sponsibilidad at tungkuling naka-atas sa mga mag-aaral ng Senior High School.

Kasunod nito ang magkabilang pagpapahayag nina G. Michael Monje ng 11-SBA, at Bb. Krizia Estrella ng 11-SLR, isa sa mga kauna-unahang babaeng mag-aaral ng paaralan nang buksan ng CSQC ang opor­tunidad upang tumanggap ng mga babaeng mag-aaral, ng kanilang mga saloobin hinggil sa kahaharaping buhay bilang mga mag-aaral sa SHS. Nabanggit ni Bb. Es­trella ang kasiyahan niya sa kanyang mga karanasan bilang isang Claretiana at nabanggit din ang kanyang planong manatili bilang isang Claretiana upang tapu­sin ang SHS dahil na nga sa kalidad ng kahusayan ng paaralan.

Ang bawat mag-aaral ay pu­masok nang nakapormal na kasuotan, na simbolismo ng kanilang estado bilang mga batang propesyonal sa henera­syong kasalukuyan, na siya ring mga magsisilbi sa li­punan sa nalalapit na kina­bukasan.

Ang mga naging guro ng palatuntunan ay sina Bb. Wilchie Dane Olayres at G. Primier Jan Pascua.

#PInningCeremony #SeniorHighSchool